பள்ளியறை

நாம் சேர்ந்து பயின்ற பள்ளியறை
கல்வி பயின்ற அறையைத் தான் சொல்கின்றேன்
கலவி பற்றி சொல்லவில்லை
ஒரு சொல்லுக்கு
முரண்பாடான இரு பொருள்கள்
காதல் என்ற ஒற்றைச் சொல்லுக்கு
நம் இருவரில் அன்று முளைத்த
இருவேறு அர்த்தங்களைப் போல...

தெய்வீகம் என்பது என் சூளுரை
சத்தியமாய் சினிமாவில் சுட்டதுதான்
இனக்கவர்ச்சி
உன் நண்பிகள் சொன்னதை நீ ஒப்பித்தது...

நீ வந்து சென்ற பாதைகள்...
உன் கொலுசும், நிழலும் கூட தவறாய் காட்டும்
என் கண்களை கேட்டிருந்தால்
அங்குல இடைவெளியின்றி அளந்து சொல்லியிருக்கும்...

நொடி தவறாமல்
உனையே பார்த்திருந்தேன்
வீட்டிற்கு செல்லும் வரை
நீயே என் வகுப்பறை...
மணியோசைக்கு ஒருமுறை
நான் பார்ப்பது கண்டு நீ சலிப்பாய்
என் பார்வைக்கு நேராய் உன் கருவிழிகள்
சங்கமத்தின் விகிதம் நாளுக்கு நாள் கூடியது
என் இதயத்துடிப்பும் தான்...

உன் வீட்டை மிதிவண்டியில்
கடந்து செல்லும் பொழுது
உன்னைக் கண்டால் உள்ளம் படபடக்கும்
உன் தந்தையை மாடியில் கண்டால்
மண்டைக்குள் மணியடிக்கும்...

வகுப்பறை முன்
உன்னை வம்படியாய் அழைத்து பேசுகையில்
தத்தித்தவித்து ஏதேதோ பேசினேன்
“லஞ்ச் பிரேக்ல என்ன சாப்பிட்ட?” உட்பட
என்னைத் தவிர்க்காமல் நீயும் பேச
உள்ளங்கை வியர்த்துக் கொட்டிப் பிசைந்து நின்றேன்...

உன் அமைச்சரவை சகாக்கள் அறிவுரையால்
என் காதல் மீதான நம்பிக்கையில்லா தீர்மானம்
எளிதில் நிறைவேரியது...

அதற்கு பின்னான காலங்களில்
எந்த பெண்ணுக்கும்
பெரிதாய் இதயம் துடிக்கவில்லை
பிடித்திருக்கின்றது என
மூளை மட்டும் சொல்கிறது
பைக்கில் எந்த அப்பனுக்கும்
பயமில்லாமல் சுற்றுகிறேன்
கை வியர்ப்பது
வெயிலில் மட்டும்தான்...

காதலின் ஆழமான உணர்வுகளை
உண்மையாய்
அழகாய்
புதிதாய்
உணர்த்திய உனக்கு நன்றி...